Ұлыстың ұлы күні - Әз Наурыз құтты болсын!Баршаңызды ұлыстың ұлы күні – Наурыз мерекесімен шын жүректен құттықтаймыз!
Әз Наурыз – сонау ерте заманнан тамыр алған, тарихи мазмұны терең, халықтың салт-дәстүрімен, әдет-ғұрпымен астасқан, әлеуметтік-рухани мәні мен маңызы зор мейрам.
Ұлыстың ұлы күні – жаңғыру мен жаңарудың, еңсесі биік елдіктің, татулық пен ынтымақтықтың, ырыс пен молшылықтың мерекесі. Күн мен түн теңелген шақта шуағын шаша келетін Наурыз адам баласын тек ізгілікке, имандылыққа ұмтылдырады. Бұл күнді халқымыз жақсылықтың жаршысы, бірліктің бастауы деп білген. Өкпе-ренішті жандар татуласып, қауышып, бір-біріне ізгі тілек, ақ пейілдерін білдіріскен. Құт-берекенің белгісі ретінде ақ дастархан жайылып, көпті көрген дана қарттарымыз елдің амандығын, жұрттың тынштығын тілеп, ақ батасын берген.
Тәуелсіздік алғалы мән-мазмұны ашыла түскен Ұлыс мерекесінің жалпыадамзаттық құндылықтарды орнықтырудағы, Қазақстан халқының бірлігін нығайтудағы рөлі айырықша. Ұлтына қарамастан әрбір қазақстандық ерекше ұлықтайтын Наурыз бүгінде жалпыхалқтық мерекеге айналды. Ұлыс мерекесі адамдарды бір-біріне кешіріммен, табиғат-анаға мейіріммен қарауға шақырады.
Наурыз мерекесінде
SoftZONE.kz ұжымы әрбір адамға амандық, еңбектеріне жеміс, отбасыларына бақ-береке тілейміз. Жаңа жылымыз - Әз Наурыз шаттықтың шапағатын себе берсін. Ұлыс оң болсын, ақ мол болсын.
Наурыз тарихы:
Наурыз мейрамы — ежелгі заманнан қалыптасқан жыл бастау мейрамы. Қазіргі күнтізбе бойынша (наурыздың 22) күн мен түннің теңесуі кезіне келеді. Көне парсы тілінде нава=жаңа + рәзаңһ=күн, «жаңа күн» мағынасында, қазіргі парсы тілінде де сол мағынамен қалған (но=жаңа + роуз=күн; мағынасы «жаңа күн»), яғни «жаңа жылды» (күн өсуін белгілеуі) білдіреді. 2010 жылдан бастап Біріккен Ұлттар Ұйымының Бас ассамблеясы «Халықаралық Наурыз күні» қарарына сәйкес 21 наурыз - Халықаралық Наурыз күні болып қабылданды.
Қазақстанда Наурыз мейрамы үш күн: 21-23 наурыз аралығында аталып өтіледі (2010 жылдан бастап). Жалпы, Наурыз парсы, кавказ және түрік халықтарының арасында көктем мейрамы және жаңа жылдың басталуы ретінде тойланады. Ол Иранда 21 наурызда, Орталық Азия елдерінде және Әзірбайжанда, мемлекеттік мереке ретінде Тәжікстанда және Қазақстанда - 22 наурызда, Өзбекстан мен Түркияда 21 наурыз күні аталып өтіледі.
Тарихы
Наурыз мейрамы басында диқаншылық пен айналысатын иран тілдес Орта Азия халықтарының күн жаз мезгіліне аусқанда егіс өсіру науқаны басталғанын мерекелеу дәстүрінен шыққан.
2010 жылы Ақпанның 23-інде Әзірбайжан мемлекеті, Ауғанстан, Иран, Қазақстан, Қырғызстан, Тәжікстан, Түркия, Албания, Македония және Үндістанның қолдау көрсетуімен Біріккен Ұлттар Ұйымының Бас ассамблеясында «Халықаралық Наурыз күні» резолюциясының жобасы таныстырылды.
Осының нәтижесінде Біріккен Ұлттар Ұйымының Бас ассамблеясы «Халықаралық Наурыз күні» қарарын бірауыздан қабылдады. Осы құжатқа сәйкес 21 наурыз - Халықаралық Наурыз күні болып қабылданды және осы ежелгі мейрам туралы ақпараттарды кеңінен тарату үшін БҰҰ-ға мүше елдерге атсалысуға үндеу тасталды.
